2026-cı ilin oktyabr ayında Bakıda daşınmaz əmlak bazarında qiymət artımı davam edib. Yeni tikili mənzillərin orta qiyməti ötən dövrlə müqayisədə 14% yüksəlib. Ən böyük bahalaşma Səbail rayonunda müşahidə olunub.
Oxu.Az-ın Report-a istinadən yaydığı məlumata görə, oktyabr ayında Səbail rayonunda yeni tikili mənzillərin qiyməti 21,8% artıb. Yasamal rayonunda bahalaşma 20,4%, Xətai rayonunda 18,6%, Nəsimi rayonunda 17,4%, Nərimanov rayonunda 17,2%, Nizami rayonunda 16%, Binəqədi rayonunda isə 14% təşkil edib.
Digər rayonlarda da mənzil qiymətlərində artım qeydə alınıb. Suraxanı və Sabunçu rayonlarının hər birində qiymətlər 9,8%, Pirallahıda 7,4%, Xəzər rayonunda 6%, Qaradağ rayonunda isə 5,4% yüksəlib.
Azərbaycan Qiymətləndiricilər Cəmiyyətinin (AQC) hesablamalarına əsasən, yeni tikili mənzillərin bahalaşmasına layihələrin yerləşdiyi ərazilər, tikinti keyfiyyəti, infrastrukturun inkişaf səviyyəsi, nəqliyyat əlçatanlığı, yaşayış komplekslərinin təqdim etdiyi imkanlar və müasir mənzillərə tələbatın artması təsir göstərir.
Köhnə tikili mənzillərin qiymətləri də yüksəlib
Oktyabr ayında Bakı üzrə köhnə tikili mənzillərin orta qiyməti 10,8% artıb.
Bu seqmentdə ən yüksək bahalaşma Səbail rayonunda 20,5%, Yasamal rayonunda 19,9%, Nəsimi rayonunda 15,9%, Nərimanov rayonunda isə 14% səviyyəsində qeydə alınıb.
Xətai rayonunda köhnə tikili mənzillər 12,6%, Suraxanıda 11,8%, Sabunçuda 11,1% bahalaşıb. Qaradağ rayonunda qiymət artımı 5,3%, Pirallahıda 5,2%, Xəzərdə 6,3%, Binəqədidə isə 6,9% təşkil edib.
Bakıda mənzillərin orta qiyməti 2 905 manat olub
AQC-nin 2026-cı ilin oktyabr ayı üzrə araşdırması paytaxtın müxtəlif rayonlarında mənzil qiymətləri arasında ciddi fərqlərin olduğunu göstərir.
Orta qiymət göstəricisinə əsasən, Səbail rayonu 4 256 manatla ilk sırada yer alıb. Ən aşağı orta qiymət isə Pirallahı rayonunda qeydə alınıb – 1 474 manat.
Maksimum qiymət göstəricisində 6 742 manatla Nəsimi rayonu lider olub. Səbail rayonunda bu rəqəm 6 259 manat, Nərimanov rayonunda isə 5 218 manat təşkil edib.
Minimum qiymət göstəricisi Nəsimi rayonunda 2 977 manat, Pirallahı rayonunda isə 1 037 manat olub.
Orta qiymətlərə görə Səbail və Nəsimi rayonlarından sonra Nərimanov (3 978 manat), Yasamal (3 452 manat), Xətai (3 427 manat) və Sabunçu (3 319 manat) rayonları sıralanır.
Bakı üzrə ümumi göstəricilərə əsasən, maksimum qiymət 3 981 manat, orta qiymət 2 905 manat, minimum qiymət isə 1 989 manat təşkil edib.
Fərdi yaşayış evləri də bahalaşıb
Oktyabr ayında Bakıda fərdi yaşayış evlərinin orta qiyməti 13,2% yüksəlib.
Ən böyük artım Səbail rayonunda qeydə alınıb – 22,8%. Nizami rayonunda fərdi evlər 16,8%, Nərimanov rayonunda 15,9%, Xəzər rayonunda 15,6%, Nəsimi rayonunda 14,1%, Sabunçu rayonunda isə 13,2% bahalaşıb.
Binəqədi rayonunda qiymətlər 12%, Suraxanı rayonunda 10,9%, Yasamal rayonunda 10,1%, Xətai rayonunda isə 9,4% artıb. Qaradağ rayonunda bahalaşma 6,5%, Pirallahı rayonunda isə 7,8% təşkil edib.